АЁЛИ ЭЪЗОЗЛАНГАН ЮРТ

Президентимиз томонидан барча соҳаларда бирдек олиб борилаётган тизимли ислоҳотлар натижасида мамлакатимизда ижтимоий ҳимояга муҳтож аҳоли, шу жумладан хотин-қизларнинг турмуш шароитларини яхшилаш, ҳаёти фаровонлигини ошириш масаласи давлатимиз сиёсатининг устувор йўналишларидан бири даражасига кўтарилди.
Натижада бугунги кунда кам таъминланган, боқувчисини йўқотган, тақдир тақазоси билан қийин аҳволга тушиб қолган аёллар муаммоларини тизимли ҳал этиш, уларни ҳар томонлама қўллаб-қувватлаш борасида кенг-кўламли ишлар амалга оширилмоқда.
8-март халқаро хотин-қизлар байрами ва “Ўзбекистон касаба уюшмалари ҳаракатининг 120 йиллиги” байрамлари шукуҳини янада юқори савияга кўтариш мақсадида бугун вилоятимизнинг барча туман, шаҳарларида яшовчи, “Аёллар дафтари”га киритилган юз нафар аёл касаба уюшмаларининг Тошкент шаҳри бўйлаб бепул туристик саёҳатига жўнаб кетишди.
Умр бўйи рўзғоридан ортиб, уйидан нарига чиқмаган эҳтиёжманд аёлларнинг дил изҳорларини тинглаган ҳар бир инсон юраги бир орзиқиб кетишига шубҳа йўқ. Умрида биринчи марта саёҳат қилаётган опа сингилларимизнинг бугунги қувончи чексиз.
Бундай эътибор ва ғамхўрликлар учун уларнинг ҳар бири Президентимизга чин юракдан самимий миннатдорчиликларини билдиришдан чарчамадилар. Мана шундай сермазмун саёҳатдан кўнгиллари тоғдек кўтарилганини айтиб адоғига етмадилар.
Энг муҳими, ҳар бир саёҳатчи аёл мамлакатимизда Президентимиз ташаббуслари билан ижтимоий ҳимояталаб хотин-қизларга кўрсатилаётган юксак эътибор ва ғамхўрликдан боши осмонга етиб, эртанги кунга бўлган ишончи ортган ҳолда ўз уйларига қайтадилар.

Маданий-маърифий ва спорт ишлари бўлими