МАСЪУЛИЯТЛИ КАСБДА МУНОСИБ ҲИССАСИ БОР

Сирдарё вилояти ички ишлар бошқармаси томонидан Халқаро хотин -қизлар куни муносабати билан байрам тадбири бўлиб ўтди. Унда бошқарма бошлиғи, полковник Шавкат Мавлонов соҳа ходималарини қутлаб, вазир генерал-лейтенант Пўлат Бобожоновнинг байрам табригини ўқиб эшиттирди. Бурчга садоқат, хушёрлик ва жиноятчиликка қарши курашишдек масъулиятли меҳнатда назокат ва латофат эгаларининг муносиб ҳиссаси борлигини эътироф этди. Байрам муносабати билан шахсий таркибга ўзининг бой ҳаётий хизмат тажрибасини етказиш борасида фаол иштирок этиб келаётган ички ишлар органи аёл фахрийлари вазирликнинг фахрий кўкрак нишони, Фахрий Ёрлиғи билан тақдирланди. “Ички ишлар органларида хизматни ўташ тўғрисида”ги Низомига мувофиқ офицерлар таркибининг навбатдаги махсус унвонлари топширилди.
Шунингдек, 17 нафар шаҳодатланган ходималар ва 108 нафар эркин ёлланма ишчи хизматчилар моддий рағбатлантирилди.
– Бу йилги байрамни унутилмас қувончли хабар билан нишонламоқдаман, – дейди Сирдарё тумани ички ишлар бўлими пробация хизмати катта инспектори Шахло Норқўзиева. – Айни дақиқаларда байрам табригини эшитиш билан бирга подполковник махсус унвони билан тақдирланганим эълон қилинди.Тизимда иш бошлаганимга 20 йилдан кўпроқ вақт ўтди. Касбим менинг ҳаётим мазмунига айланган. Доимо Ватанимга хизмат қилишга қасамёд қиламан.
Вилоят ички ишлар бошқармаси ҳудудий профилактика бўлими хотин –қизлар масалалари бўйича инспектори майор Малоҳат Тожиева тизимда меҳнат қилиб, ҳурмат -у иззат топганлардан. Бугун унинг икки фарзанди ҳам соҳада меҳнат қилмоқда. Айём муносабати билан Малоҳат Тожиева вазирликнинг қўл соати билан тақдирланди.
Тизимда касаба уюшмалари фаолияти иш бошлаганига 3 йил бўлди. Шу давр давомида соҳа ходимларини қўллаб –қувватлаш, меҳнат унумдорлигини ошириш, уларни рағбатлантириш мақсадида ўз иш режасини амалга ошириб келмоқда. Фаолият давомида аёллар меҳнатини қадрлаш, уларга муносиб иш шароитлари яратиш, мазмунли дам олишларига алоҳида эътибор қаратилмоқда.
Тадбирда байрам дастурхони ёзилиб, таниқли санъаткорлар иштирокида концерт дастури бўлиб ўтди. Тизимла ишловчи аёл ходималар ўзларининг тайёрлаган мусиқий чиқишларини тақдим этиб, ўз иқтидорларини номойиш этишди.

Ҳамидулла АБДУЛЛАЕВ,
Сирдарё вилояти ишчи ишлар бошқармаси
бирлашган касаба уюшма қўмитаси раиси