ТЕМИРЙЎЛЧИ АЁЛЛАР УЧУН СПОРТ МУСОБАҚАСИ ТАШКИЛ ЭТИЛДИ
03.03.2020. Ўзбекистон темирйўлчилари ва транспорт қурувчилари касаба уюшмаси Республика Кенгашининг соғломлаштириш ва оммавий спорт тадбирларини ўтказиш учун 2020 йилга мўлжалланган календарь режаси ижросини бажариш мақсадида “Локомотив” марказий жисмоний спорт клубида “8 март – Халқаро хотин-қизлар куни” муносабати билан тармоқ корхоналарида фаолият кўрсатаётган аёллар ўртасида спартакиада ўтказилди.
“Ўзбекистон темир йўллари” акциядорлик жамияти тасарруфидаги барча минтақавий темир йўл узеллари, корхона ва ташкилотлардан келган 50 нафарга яқин иштирокчи спортнинг югуриш, шашка, тўпни айланага ташлаш баҳси ҳамда дартс турлари бўйича ўзаро куч синашдилар. Спорт мусобақаларининг ҳар бир турини қизиқарли ва адолатли ўтказилишини таъминлаш мақсадида “Локомотив” марказий жисмоний спорт клуби раҳбарияти томонидан барча зарур шароитлар яратиб берилди. Хотин-қизларнинг ҳар бир иштироки клубнинг тажрибали ҳакамлари томонидан адолатли бошқариб борилди. Кескин ва муросасиз баҳсларда энг кучлилар аниқланиб, ғолиблар номи эълон қилинди. Унга кўра шашка бўйича “Қарши минтақавий темир йўл узели” унитар корхонаси ходими М. Саидова 1-ўринга сазовор бўлди. Стол тенниси бўйича “Тошкент минтақавий темир йўл узели” унитар корхонаси ходими .Ш Тўлагановага 1-ўрин соҳиби бўлди. Тўпни айланага ташлаш баҳси бўйича 1-ўрин “Қуюв механика заводи” шўба корхонаси ходими Ш.Малаевага насиб этди. Дартс бўйича И.Наканечникова ғолиб бўлди. Жамоа бщлиб югуриш мусобақасида “Тошкент механика заводи” акциядорлик жамияти жамоаси ғолиб бўлди. Иккинчи ва учинчи ўринлардан “Қурилишмонтаж” унитар корхонаси ҳамда “Қўқон минтақавий темир йўл узели” жамоаси спортчилари жой олишди.
Мусобақа якунида ғолиблар ҳамда иштирокчилар Тармоқ касаба уюшмаси Республика Кенгашининг қимматбахо эсдалик совғалари билан тақдирланди.
Шу куни ҳудудлардан келган барча иштирокчилар учун Тошкент шаҳри бўйлаб саёҳат уюштирилди.
